Omnibus Familiae Sancti Hieronymi sodalibus gaudium Paschale et salutem!

Ex temporibus antiquis homines Catholici dulci consuetudine sepulchra necessariorum mortuorum aliquando visitant ut coram reliquiis orationes ad Deum fundant, et ibi colloquia quodammodo cum anima cari habeant.  Quinimmo Summus Pontifex Paulus II carmen nomine Ad Aemiliam, Matrem Meam hac de re scripsit, has lineas flexanimas continens:

Supra sepulchrum candidum tuum Genibus nixus mea cum tristitia O quam multum transivit temporis! Attamen paucum hodie mihi videtur. Supra sepulchrum candidum tuum, O mater, amor exstincte, os meum susurrabat exhaustum: Requiem aeternam dona.

Breviarium Romanum, quoniam penitiorem animi motum hoc tempore recognoscit, peculiares in anniversario depositionis orationes tribuit, quas pro beatudine Patris Suitberti admovere quimus:

Deus, indulgentiarum Domine, da animae famuli tui Suitberti, cujus anniversarium depositionis diem commemoramus, refrigerii sedem, quietis beatitudinem, et luminis claritatem.  Per Dominum nostrum Jesum Christum Filium tuum, qui tecum vivit et regnat in unitate Spiritus Sancti, Deus, per omnia saecula saeculorum.  Amen. Deus, qui inter apostolicos sacerdotes famulum tuum Suitbertum sacerdotali fecisti dignitate vigere:  praesta, quaesumus, ut eorum quoque perpetuo aggregetur consortio.  Amen. In lege Domini voluntas ejus, et in lege ejus meditabitur die ac nocte.

Ultimum per annum epistulas plures accepimus consolatorias.  Fas sit nunc mihi unam ante vos ponere ob sensus calamique pulchritudinem, quam Rev. Pater Augustinus van Berkum, O.S.B., Abbatiae Montis Sancti Benedicti Batavae, humane scripsit.  Placeat vobis hanc epistulam aspicere quae moribus Catholicis perennibus fragrat.

Quaedam res novae proposita Familiae Sancti Hieronymi sustinent.  Sedes Apostolica duo documenta nuper promulgavit quae conjunctionem et linguae Latinae et Sacrarum Scripturarum cum Sacramento Caritatis exprimunt.  In Lineamentis Coetus Generalis Ordinarii (Episcoporum) Sanctus Hieronymus feliciter citatur:

Haec Synodus, superiorem continuata, hoc in luce collocare contendit, Eucharistia et Verbum Dei interiore quadam necessitudine inter se conjuncta esse ... Sic enim Sanctus Hieronymus ait:  «Caro Domini vere est cibus et sanguis ejus verus est potus;  hoc solum habemus in praesenti saeculo bonum;  si vescamur carne ejus et cruore potemur, non solum in mysterio, sed etiam in Scripturarum lectione.  Verus enim cibus et potus, qui ex Verbo Dei sumitur, scientia Scripturarum est.»

Jamvero, Adhortatione Apostolica Postsynodali Sacramentum Caritatis ipsa, Summus Pontifex Benedictus XVI sequentia dixit:

Ad melius ostendendam unitatem et universalitatem Ecclesiae ... aequum est ut hujusmodi celebrationes [Coetuum Internationalium] fiant lingua Latina;  similiter Latine recitentur orationes pervulgatae Ecclesiae traditionis et forte cantentur quaedam partes in cantu Gregoriano.  In universam petimus ut futuri sacerdotes, inde a Seminarii tempore, ad Sanctam Missam Latine intellegendam et celebrandam nec non ad Latinos textus usurpandos et cantum Gregorianum adhibendum instituantur;  neque neglegatur copia ipsis fidelibus facienda ut notiores in lingua Latina preces ac pariter quarundam liturgiae partium in cantu Gregoriano cantus cognoscant.

De his et de omnibus quae de praestantia linguae Latinae Summi Pontifices edixerunt vere laetamur.  Liceat nobis autem etiam sperare ut, occasione danda, Sedes Apostolica amplius loquatur de via qua lingua Ecclesiae Latina ad sanctitatem conducit.  Animadverti potest quod per hanc linguam Patres Ecclesiae Latini (quorum opera sunt fontes pietatis) et multi Sancti fructuose legantur;  Biblia Vulgata, quam solam Ecclesia «authenticam» declaravit, volutetur;  a Missa Romana Latina et Liturgia Horarum funditius gratiae imbibantur;  a Cantu Gregoriano et Sacra Polyphonia ad limina Caeli elevemur;  ab erroribus qui ob labiles linguas vulgares in doctrinas irrepunt¹ protegamur;  Diabolus cum insidiis suis Latine validius fugetur²;  cum Sede Apostolica, petra in qua Ecclesia aedificata est et orthodoxiae custode, arctius jungamur;  tandem, Deus vocem Sponsae propriam audiens, nobis amantius fortasse misereatur.

Egregius vir Catholicus Samuel Alito, novus judex Tribunalis Supremi Civitatum Foederatarum Americae Septentrionalis, etiam sermoni Romano videtur favere.  Photographiam adjunctam videte, quaeso, quam nobis misit sodalis F.S.H. noster Richardus Watson, M.D., Novocaesariensis.  Judex Alito, una cum judicibus Catholicis Scalia, Thomas, et Roberts (qui saepe apud Missam Latinam Washintoniae assistunt) die 18 mensis Aprilis, lite nomine Gonzalez v. Carhart, contra abortium paenenati dijudicaverunt, malorum praecedentium ejusdem tribunalis anteriorem conversionem (speratur) incohantes.

Hanc epistolam, benevoli socii, re propria concludere liceat.  Die 19 mensis hujus filia mea, Julia³, cui in religione nomen Soror Agnes data est, prima solemnia vota in ordinem Benedictinarum Mariae, Reginae Apostolorum, ante duos episcopos et abbatem, necessariis astantibus, profitebitur.  Orate pro ea, quaeso, humanitate vestra, ut a Deo uberrime benedicatur, et maxima gratia impleatur, dum fideliter sequatur Sponsum ubicumque ducat.

Ad proximum commercium vel congressum usque, valeatis omnes.

Joannes Halisky
J.G. Halisky
Secretarius

P.S.  Ne obliviscamini Cenaculi Tampensis apud Domum Franciscanam a die 22 usque ad diem 27 mensis Julii, quod multa bona, multa jucunda, multa fructuosa pollicetur.