Familia Sancti Hieronymi Constitutio
	Caput	Sectio
	I :	De Consociationis Fine
	II :	De Mediis ad Finem Consequendum Adhibendis
	III :	De Familię Sancti Hieronymi Compagine et Dispositione Organica
	IV :	De Familię Sancti Hieronymi Sede, Regimine, Aggregatione Membrorum Atque Bonis Temporalibus

(Caput I ) DE CONSOCIATIONIS FINE

Ab summa pagina

Cujus consociationis membra fieri possunt omnia fidei Romanę Catholicę homines, qui una nobiscum in hunc finem sibi constituendum consentiant, ut

1. Sincerum amorem erga Summum pontificem et filialem obœdientiam erga ejus Supremum Magisterium Ecclesiasticum profiteantur;

2. Vitam spiritualem quę ad intimam cum Deo unionem conducit secundum tot Sanctorum doctrinam et eorum vestigia sequentes intense et fideliter colant;

3. Linguam Latinam vivam, Romanę Ecclesię propriam, sedulo studio et cotidianis exercitiis ita discere satagant, ut tandem facile et expedite tum Latine scripta legere, cum et cogitare et loqui et scribere Latine valeant.

(Caput II ) DE MEDIIS AD FINEM CONSEQUENDUM ADHIBENDIS

Ab summa pagina

1. De unione spirituali cum Summo Pontifice
   Omnes Familię Sancti Hieronymi membra
   1. pro posse documenta a Summo pontifice edita fideliter legant;

   2. ea quę a Summo Pontifice in gubernanda Ecclesia aguntur perspecta habeant;

   3. orationes pro Summo Pontifice cotidie fundant.

2. De vita spirituali convenienter alenda

   Omnibus Familię Sancti Hieronymi membris, ut vitam spiritualem convenienter alant - pręter sanctę Missę sacrificium, sanctam communionem et frequentem peccatorum confessionem - exercitia spiritualia quę sequuntur enixe commendantur:

   1. Lectura spiritualis sive lectio divina, nempe conveniens tempus cotidianum quo meditative sive contemplative, id est lente et in spiritu orationis tum Sacra Scriptura cum Scripta Sanctorum ita legantur, ut paulatim nobis in succum et sanguinem transeant;

   2. Oratio mentalis, intima nempe semper et ubique possibilis conversio animę ad Deum;  quę oratio et lectionem spiritualem pręcedat oportet et ex ea profluat et magis magisque in diem perduret;

   3. Inter ceteras orandi formas primum locum obtinet sanctum Marianum Rosarium, quo maxima fidei nostrę mysteria in unione cum Beatissima Virgine Dei Genitrice Maria a nobis recoluntur;  accedat, in quantum possibile sit, recitatio Liturgię Horarum sive ex toto sive ex parte quam quisque sibi pro posse selegerit (verbi gratia, Laudes, Vesperę, Completorium).

3. De studio et usu linguę Latinę

   Ut omnia Familię Sancti Hieronymi membra in cogitando et loquendo, in legendo et scribendo paulatim ad facilem et expeditum linguę Latinę usum perveniant, firma spe freti - memores illius proverbii "GUTTA CAVAT LAPIDEM" - cotidiana exercitia numquam omittant.
   Hęc autem exercitia se extendunt ad ea quę sequuntur:

   1. Illa Familię Sancti Hieronymi membra, quę nullum hucusque vel fere nullum habent linguę Latinę usum, varios adhibeant "Cursus linguę Latinę vivę" sive manualia in hunc finem edita, sive etiam Latinas Romanę pronuntiationis capsas magnetophonicas, ut linguam Latinam vivam discere valeant.

   2. In quantum possibile sit, omnia Familię Sancti Hieronymi membra Summi Pontifici Encyclicas et Litteras Apostolicas, Documenta Concilii Vaticani II et cetera ecclesiastica documenta Latine legant.

   3. Pro lectione quoque spirituali Bibliam adhibeant editionis Vulgatę Latinę;  itemque Latine legant sanctos Patres Ecclesię, itemque medii ęvi sanctos vitę spiritualis atque Ecclesię, itemque medii ęvi sanctos vitę spiritualis atque verę theologię Catholicę magistros, inter quos summus eminet sanctus Thomas Aquinas.

   4. Sanctum Rosarium Marianum, Liturgiam Horarum, ceterasque preces privatim fusas Latine recitent;  occasiones vero assistendi sanctis Missis Latine celebratis ne omittant;  immo, ubi hoc sine lite et bello et odio pacifice fieri potest, ipsi quoque, ut sanctę Missę Latine celebrentur, occasione data humanissime proponant.

   5. Inde ab initio omnes satagant acquirere consuetudinem Latine cogitandi et ea quę jam sciunt Latine exprimendi.

(Caput III ) DE FAMILIAE SANCTI HIERONYMI COMPAGINE ET DISPOSITIONE ORGANICA

Ab summa pagina

Pręambulum

Familię Sancti Hieronymi compago et dispositio organica - cum Romanę Catholicę fidei homines utriusque sexus, omnis ętatis, cunctorum ordinum vel officiorum vel munerum, universarum quoque nationum ad hanc Familiam attracti et vocati esse possint - sat ampla et diversis vitę condicionibus adaptanda sit oportet.

1. De Cenaculis Sancti Hieronymi
   1. Hęc tota et universalis Familia Sancti Hieronymi in partes dividitur, quę singulę certum numerum membrorum et aliquam ubi hęc membra congregentur sedem comprehendunt.  Hę partes singulę atque earum sedes appellantur

      CENACULA SANCTI HIERONYMI.

   2. Universa Cenacula Sancti Hieronymi, quę juxta locorum condiciones ceterasque circumstantias sat varia esse possunt, secundum pręcipuam earum indolem et structuram in tria distinguuntur genera : Cenacula enim Sancti Hieronymi sunt alia ORDINARIA, alia SCHOLASTICA, alia tandem MONASTICA. Quę tria genera , in circulis quasi concentricis disposita, totam Familiam Sancti Hieronymi constituunt.
2. De Cenaculis Sancti Hieronymi Ordinariis
   1. Ubi aliquot Familię Sancti Hieronymi membra in quadam vicinia habitant, pro posse satagant statutis temporibus in loco apto convenire, ut et in communi Latine orent et inter se Latine colloquantur.  In locis ubi fieri potest, convenit ut communiter assistant sanctę Missę sacrificio Latine celebrando, secundum normam capite II, paragrapho 3, littera d hac de re datam. Hę aliquot membrorum Familię Sancti Hieronymi congregationes atque earum sedes appellantur

      CENACULA SANCTI HIERONYMI ORDINARIA.

   2. Quamvis ordinarie unumquodque membrum Familię Sancti Hieronymi alicui Cenaculo adscribatur atque cum ceteris hujus Cenaculi membris in statuta sede congregetur statutis temporibus, tamen ex Familia Sancti Hieronymi non excluduntur illi, qui a ceteris hujus Familię membris ita sejuncti vivunt, ut propter distantiam locorum ad nullam alicujus Cenaculi sedem se conferre possint.

   3. Qui in talibus circumstantiis versantur, Familię Sancti Hieronymi adhęrere et ejus membra esse possunt, dummodo fideliter observent ea quę capitibus I et II hujus Constitutionis de membrorum obligationibus dicta sunt.  Insuper ligamen et unionem cum Familia Sancti Hieronymi, quocumque modo possunt, colant atque sustentent.

3. De Cenaculis Sancti Hieronymi Scholasticis
   1. Optandum est ut adjuvante Dei gratia secundum diversas locorum conditiones

      CENACULA SANCTI HIERONYMI SCHOLASTICA

      quoque condantur, talia nempe ubi activitates permanentes fini hujus consociationis consentaneę exerceri possunt, communi quorundam saltem membrorum labore sustinendę, uti sunt:

      • - scholę linguę Latinę vivę

      • - editiones librorum vel foliorum Latinorum

      • - editio capsarum magnetophonicarum vel audiovisificarum Latinarum et cetera hujusmodi.

   2. Tota Familia Sancti Hieronymi hęc Cenacula Scholastica magni faciat, atque Cenacula quoque Ordinaria his Cenaculis Scholasticis adjutorio esse et illis pro posse operam dare satagant.

4. De Cenaculis Sancti Hieronymi Monasticis
   1. Centrum totius Familię Sancti Hieronymi constituitur ab illis qui, a Deo vocati, in una domo simul in communi viventes solis orationibus et studiis sacris vacant.  Singulę hujus generis communitates appellantur

      CENACULA SANCTI HIERONYMI MONASTICA.

   2. Harum communitatum sodales non tantum in orationibus et studiis sacris, sed etiam in cotidianis laboribus et colloquiis sola lingua Latina utantur.

   3. Ceterum hęc Cenacula Sancti Hieronymi Monastica reguntur propria ipsorum Regula et Normis propriis, secundum pręscripta Codicis Juris Canonici, congrua congruis referendo.

(Caput IV ) DE FAMILIAE SANCTI HIERONYMI SEDE, REGIMINE, AGGREGATIONE MEMBRORUM ATQUE BONIS TEMPORALIBUS

Ab summa pagina

1. De Sede
   1. Sedes totius consociationis quę „Familia Sancti Hieronymni" nuncupatur - nisi posteriore tempore aliter videbitur - pro nunc ille intelligitur locus ubi hęc consociatio condita est, nempe Aquę Clarę Floridianę (i.e., Clearwater, Florida, U.S.A.)

   2. Hanc Sedem totius Familię Sancti Hieronymi in alium locum transferre competit auctoritati Consilii Generalis.

   3. Ad auctoritatem Consilii Generalis quoque pertinet quęstionem de Sede aliter definire atque, pręter Sedem principalem et sub illa, Sedes forte regionales erigere et quid illis competat statuere.

2. De Regimine
   1. Toti Familię Sancti Hieronymi paterne pręest PRAESES GENERALIS, cui in munere assistunt DUO CONSILIARII.  Qui tres una simul CONSILIUM GENERALE efficiunt.  Consilium Generale jus habet alia quoque membra sibi in hoc munus asciscendi.

   2. Ab ipso Consilio Generali omnia negotia ad totam Familiam Sancti Hieronymi attinentia expediuntur.  Item a Consilio Generali ad negotia expedienda alii quoque officiales nominari possunt.

   3. Si unus ex membris Consilii Generalis vel justa de causa officio renuntiaverit vel vita functus fuerit, a ceteris Consilii Generalis membris nominatur substitutus.

   4. In singulis Cenaculis Sancti Hieronymi negotia omnia in spiritu verę familię in quantum fieri potest concorditer et collegialiter expediantur.

   5. Ad regimen Cenaculorum Sancti Hieronymi Monasticorum quod attinet, servantur leges Codicis Juris Canonici atque Normę proprię a competenti Ecclesię auctoritate approbandę.

3. De aggregatione membrorum atque de fidelitatis proposito et promissione
   1. Qui homines Familię Sancti Hieronymi nomen dare atque ei ut membra aggregari possint, capite I, paragraphis 1 - 3 hujus Constitutionis statutum est.

   2. Candidatus incipit esse membrum Familię Sancti Hieronymi a die quo rescriptum aggregationis a Concilio Generali datum est.

   3. Novum membrum, cum rescriptum aggregationis petit, adjuvante Deo triplicem hujus Familię Sancti Hieronymi finem fideliter prosequendum promittat;  quod fidelitatis propositum in corde suo frequenter renovare consuescat.

   4. Unumquodque Familię Sancti Hieronymi membrum, postquam per triennium triplici hujus consociationis fini fideliter adhęsit, promissionem suam in quodam cenaculo Sancti Hieronyml, aliis Familię Sancti Hieronymi Membris pręsentibus, publice recitando sollemniore ritu renovet atque confirmet.

   5. Formula autem promissionis est hęc:  "Adjuvante Deo Omnipotenti, Beatissimę Virgini Marię atque Sancto Hieronymo, patrono nostro, ego promitto

      • imprimis sincerum amorem et filialem obœdientiam erga Summum Pontificem ejusque Supremum Magisterium,

      • deinde studium vitam spiritualem quę ad intimam cum Deo unionem conducit secundum tot Sanctorum doctrinam et eorum vestigia sequens intense et fideliter colendi,

      • tandem studium cotidianis exercitiis bene discendi et usu provehendi linguam Latinam vivam, Ecclesię propriam."

   6. Aggregatio ad Familiam Sancti Hieronymi cessat:
      • libera declaratione membri se consociationem relinquere velle;
      • dimissione a Consilio Generali justa de causa alicui membro intimata.

4. De bonis temporalibus

1. Tota Familia Sancti Hieronymi jus habet acquirendi, possidendi, administrandi bona temporalia.  Hęc bona in utilitatem totius consociationis administrantur a Consilio Generali quo tota Familia Sancti Hieronymi repręsentatur.

2. Unumquodque Cenaculum Sancti Hieronymi bona temporalia acquirere, possidere, administrare potest;  de modo, quo hęc bona administrentur, singula Cenacula decidere valeant.

3. Si Familia Sancti Hieronymi dissolvitur, ejus bona in possesionem alius Instituti Religiosi a Concilio Generali in actu dissolutionis determinandi transferuntur.

5. De normis particularibus
   • Consilum Generale minutas normas vel regulationes particulares, quę ei opportunę videbuntur, edere potest.

   • Datum apud AQUAS CLARAS FLORIDIANAS, in Sollemnitate Beatissimę Virginis Marię de Monte Carmelo, A. D. MCMLXXXIX.

     /s/ Pater Suitbertus a Sancto Joanne a Cruce, O.C.D.
     /s/ Joannes G. Halisky

   • (Juxta canonem 322 Codicis Juris Canonici approbatum ab Episcopo John C. Favalora, Diœcesis Petropolitanę Floridianę, rescripto dato die 5 Decembris 1990.)

Status:  2006 Novembris 10

Privilegium impressorium:
Jus proprietatis librarię Familię Sancti Hieronymi, 1989
(copyright by Familia Sancti Hieronymi, 1989)
Scriptum linguâ "HTML" ab Erico Steinhauer (1989) et Brenno Regan (2001, 2006)